රාවය

අහා! සිරිසේනයෙනි, කතාව නම් මරුය!

අහා! සිරිසේනයෙනි, කතාව නම් මරුය!

සුනන්ද දේශප්‍රිය

සිරිසේනයෙනි, කතාව නම් මරුය. එහෙත් ….
මට නලින් සුවාරිස් මතකයට නැගුණි. අප මුලින්ම හමුවූයේ 1979 ග්‍රීෂ්ම ඍතුවෙහිදී නෙදර්ලන්තයේදී ය. සත්වසරක් හිරබත් කා නිදහස් වූ අලුත මට එරටට එන්නැයි ගජමිතුරු ආරාධනයක් ලැබූණි.
නලින් ඇසූ පිරූ තැන් නිර්මාණශීලී ශාස්ත්‍රඥයකු විය. එකල ඔහු නෙදර්ලන්තයේ සරසවියක උගන්වමින් සිටියේ ය. පූජක දිවිය අතහැර ගිහි ජීවිතය තෝරා ගෙන තිබූ නලින් සැහැල්ලු කතාබහ මැද පූජකවරුන් අරබයා ගොඩ නැගී ඇති විහිලු කතා කීවේය. ඒ කතා සමාජ විවේචනයක්ද විලසිණි. එක් කතාවක් මෙසේ ය.
“වරක් පූජකවරයකු ඈත ගමක ආගමික මෙහෙවරකට ගියේය. ඒ අතරවාරයේ ඔහුට කක්කා දැමීමට අවශ්‍ය විය. යායුතු වූයේ ලැහැබටය. සිය අවශ්‍යතාව කී කල ඔහුගේ ශ්‍රාවකයෝ දෑත් හිසේ ගසා ගත්හ. මගේ දෙයියෝ, ඔබත් ඔය ගඳ වැඬේ කරනවද? අපි හිතන් හිටියේ ගඳ කක්කා වැක්කෙරෙන්නේ අප වැනි පවුකාරයින්ට කියලා විතරයි.”
තමන් හුදී ජනයාට ඉහළින් සිටින දෙවියන්ගේ කිරීම කිරිවන් නියෝජිතයින් ලෙස පෙනී සිට සිය ජීවිකා වෘත්තිය පවත්වා ගන්නා පූජ්‍යත්වයේ ව්‍යාජත්වය ඉන් උපහාසයට ලක් කෙරුණි.
මට නලින් මතක් වූයේ මේ දිනවල සිරිසේනගෙන් ද දේශපාලන කක්කා වැක්කෙරෙන නිසාය. සිරිසේන, ඔන්න කක්කා යැයි කියන්නට රජතුමා හෙළුවෙන් යැයි කී කොළුවා වැනි මිනිසෙක් ඊයේ පෙරේදා කොහේ හෝ සිටියේ ය. ඔහු හෝ ඇය කළේ සරල දෙයකි. ජනාධිපතිගේ ට්විටර් සමාජ ජාල ගිණුමට රහසේ ඇතුළු වී එකම එක ශිෂ්ට පණිවිඩයක් එමගින් විසුරුවා හැරියේ ය.
ඉන් කියැවුණේ “ජනාධිපතිතුමනි ඔබේ කතා මරු. ඒත් ඒවා වැඩ බවට පත්කරන පිළිවෙළක් ඕනෑ නේද? කරල පෙන්නන්න!” කියාය.
අසාම් අමීන් නම් තරුණ ජනමාධ්‍යවේදියා විසින් එම ට්වීටය “ජනාධිපතිට ජනාධිපතිගෙන්ම උපදෙසක්” කියා සිය සමාජ මාධ්‍ය ට්විටර් ජාලයට මුදා හැරියේය. ඔහුගේ ට්ව්ටර් ජාලයෙහි සෙනඟ 141,000කි. එමෙන්ම ඇති තතු දැනගත් වහාම ජනාධිපති ට්විටර් ගිණුම ටික වේලාවකට අන්සතුවී ඇතැයි පණිවිඩයක්ද සිය ජාලයට මුදා හැරියේ ය.
දැන් අසාම් අමීන් එම ට්විටර් පණිවිඩය ගැන ප්‍රශ්න කරන්නට රහස් පොලීසියට කැඳවා තිබේ. කක්කා වැක්කෙරෙනවා යැයි කියන්නේ කටින් බතල කොළ හිටවන ගමන් කරන මෙවැනි බියගැන්වීමේ තර්ජන වලටය. මේ වනාහි බියගැන්වීමේ සංඥාය.
(විමසිලිමත් ජනමාධ්‍යවේදියකු වූයේ නම් අසාම් අමීන් එම පණිවිඩය යැවිය යුතු වූයේ ජනාධිපති ට්විටර් ගිණුම හැක්වී ඇතැයි යන වචනද සමඟය. මන්දයත් ජනාධිපතිට අපහාස වන උපදෙසක් ඔහුගේ සමාජ ජාලයකින් මුදාහැරීමට ඉඩක් නැති නිසාය. ඉක්මන සමඟ හරි තොරතුරු සොයා ගැනීමට උනන්දුවක් නැති තැන, ජනමාධ්‍යවේදය බාලවෙයි.)
ප්‍රශ්නය එයම නොවේ. මෙම ට්විටර් පණිවිඩය ගැන ඉහමොළ රතු වූ පොලීසිය ඊට වඩා අතිශයින්ම හානිකර සිදුවීමක් ගැන ට්විටර් සමාජ ජාලයෙහිම පැතිර ගිය වෙනත් සිදුවීමක් ගැන පියවර ගැනීමට කිසිදු හදිසියක් නොපෙන්වීමයි. එම සිදුවීම නම් සිංහල දුම්රිය සේවකයකු විසින් දෙමළ කාන්තාවකට ලිංගික අතවර කිරීමට තැත් කිරීමත් “මුන් දෙමළු කැරි බල්ලෝ” යැයි මහ හඬින් බැණ වැදීමත්ය. එය සිදුවූයේ සඳුදා උදෑසන කොළඹ සිට යාපනය බලා ගිය දුම්රියෙහිදීය. එම අතවරය නැවැත්වීමට උත්සාහ කළ තවත් දෙමළ ජාතිකයකුට පහරදීමටද එම පුද්ගලයා උත්සාහ කොට තිබුණි.

මෙම සිදුවීම ප්‍රසිද්ධියට පත්වූයේ එම දුම්රියේම ගමන් කරමින් සිටි උත්තයරාසා ශාලින් නම් ජනමාධ්‍යවේදියා විසින් එම සිදුවීමෙන් කොටසක් වීඩියෝගත කර ට්විටර් ජාලය ඇතුළු සමාජ මාධ්‍ය ජාලයන්ට මුදාහරින ලද නිසාය. එම සඳුදාම ලක්ෂ සංඛ්‍යාත පිරිසක් විසින් එය නරඹා යළි යළි බෙදාහැර තිබුණි.
වීඩියෝ සාක්ෂි තිබියදීත් එම පුද්ගලයාට එරෙහිව පියවර ගැනීමට නම් අදාළ කාන්තාව විසින් පොලීසියට පැමිණිල්ලක් කළ යුතු යැයි යාපනය පොලීසිය කියා සිටියේ ය. පසුව පැමිණිල්ල දැමීමට ගිය ඔවුන්ට පැය 4ක් රස්තියාදුවීමට සිදුවිය. අනතුරුව අඟහරුවාදා සවස, ආණ්ඩුවේ දෙමළ ඇමැතිවරයකු විසින් දක්වන ලද උනන්දුව නිසා අතවරය කළ දුම්රිය සේවකයා අත්අඩංගුවට ගන්නා ලදි. බදාදා උදෑසනම පොලීසියේ විරුද්ධත්වයක් නොවූ නිසා ඔහුට ඇප ලැබුණි. (මෙම කාන්තාව විදෙස්ගත දෙමළ අයකු බැවින් ඇය නොපැමිණියහොත් නඩුවක් ගෙන යා නොහැකි යැයි පොලීසිය දැනටමත් කියා තිබේ.)
දැන් යළි අර මරු කතාවට එමු. ජනාධිපතිගේ ට්විටර් ගිණුමට ඇතුළු වූ හැකරයා හෝ හැකරිය කවරකු වුවත් සිරිසේනට දී ඇති අවවාදය කටේ මසුරන් දැමීමට තරම් වටිනා එකකි. බොහෝ විට මෙම හැකරයා සඳහන කරන්නට ඇත්තේ සිරිසේනගේ මඩකළපු දේශනයයි.
තමා 2020 දී විශ්‍රාම නොගන්නා බවත් ඊට හේතු කළයුතු වැඩ තවමත් තිබෙන නිසා බවත් සිරිසේන සිය මඩකළපු දේශනයේදී කීවේය. ඔහු තවදුරටත් කියා සිටියේ තමන් ඒ සඳහා මංකොල්ලකරුවන් සහ මිනීමරුවන් සමග එක් නොවන බවයි. මංකොල්ලකරුවන් යනුවෙන් ඔහු සඳහන් කළේ කවුරුන්දැයි තේරුම් ගැනීම අද මෙරට දේශපාලනයේ ඇති ලොකුම ගැටලුවක් විය හැකිය. මන්දයත් මෙරට ප්‍රධාන දේශපාලන පක්ෂ සියල්ලම වාගේ ජන ඝාතනයන්ට කෙළින්ම හෝ වක්‍රව සම්බන්ධ වී ඇති නිසාය. මහජන දේපළ ගසාකෑම සහ රාජ්‍ය සම්පත් මංකොල්ල කෑම අතින් ශ්‍රීලනිපයත් එජාපයත් අතර එතරම් වෙනසක් නැත.
සිරිසේන පෙන්වන්නට හදන්නේ තමන් ඒ දෙකටම ඉහළින් සිටින රජ්ජුරුවන් කෙනෙක් බවයි. ( රජ්ජුරුවෝ උඩයි උඩයි ගූ බල්ලෝ බිමයි බිමයි යැයි කළ සෙල්ලම මතකද?)
කෙසේ වෙතත් ඒ මරු කතාවට ඌනපූරණයක් වශයෙන් ප්‍රශ්න කිහිපයක් මෙන්න:
සිරිසේනගේ ලේකම් කෝටි දෙකක අල්ලස් ගනිද්දී අල්ලා ගැනීම අප තේරුම්ගත යුත්තේ කෙසේද? මෙම පුද්ගලයා දූෂිතයකු බවට ඇති තරම් තොරතුරු තිබියදීත් සිරිසේන ඔහු පත්කර ගත්තේ ඇයි? මෙම පුද්ගලයා දූෂිතයකු බව වූ සාක්ෂි සහිත චෝදනා සිරිසේන නොසලකා හැරියේ ඇයි? එම දූෂිතයාගේ පුතකු සහ සිරිසේන පුත් දහම් සිරිසේන ලොව වටා එකට රවුම් යන බවට පළවී ඇති වාර්තා ඇත්තද? එම අල්ලස ගැනීම සිදුවූ හෝටලයේ එම අවස්ථාවේදී දහම් සිරිසේන නතරවී සිටි බවට සමාජ ජාලයන්හි පැතිර යන කතා ඇත්තද?
කාන්තාවන්ට මත්පැන් මිලදී ගැනීම තහනම් කළ සිරිසේනගේ ජීවිත කතාවෙහි නිල රචිකාවිය වූ දියණිය චතුරිකා සිරිසේන මත්පැන් බාර් ලයිසන් එකක් ලබාගෙන ඇති බවට පළවී ඇති වාර්තා ඇත්තද? එමෙන්ම පරාක්‍රම සමුද්‍රයෙහි වැව් තාවුල්ලෙහි ඇය විසින් හෝටලයක් ගොඩ නගා තිබෙනවා නේද?
එම අල්ලස් ගනුදෙනුවට මාට්ටු වූ දැව සංස්ථාවෙහි සභාපතිකමට දූෂණ සම්බන්ධයෙන් වාර්තා තබා ඇති, ජවිපෙන් එනිසාම ඉවත කරන ලද, පසුව වීරවංශට මුක්කු ගසා දැන් සිරිසේනට හේත්තු වී ඇති දේශපාලනඥයකු සිරිසේන විසින්ම පත් කරන ලද්දේ දූෂණ වැළැක්වීමටද? තවදුරටත් ගසා කෑමටද?
රාජපක්ෂ සමයෙහි හම්බන්තොට වරාය නිරීක්ෂණය කිරීමට ගිය එජාප දේශපාලනඥයින් පසුපස පිස්තෝලයක් උලුක් කරමින් හඹා ආ, ජනාධිපතිවරණ සමයෙහි සාදුජනරාව ගායක ජයතිලක බණ්ඩාර ඇතුළු පිරිසට පහර දුන් එරාජ් ප්‍රනාන්දු නම් දේශපාලනඥයා එජාපය වැඩි බලය දිනූ හම්බන්තොට නගර සභාවෙහි සභාපතිකමට රාජපක්ෂලාගේ සහයෝගයෙන් පත් කරන ලද්දේ ආදර්ශයක් දීමටද?
බදුල්ල පළාත් සභාවෙහි අධ්‍යාපන ඇමැති වශයෙන් එම නගරයේ දෙමළ බාලිකාවෙහි විදුහල්පතිවරියකට අනිසි ලෙස ළමුන් ඇතුළත් කරගන්නා ලෙස බලකර, ඊට අවනත නොවූ බැවින් තමාට වඳින ලෙස නියෝග කළ බවට චෝදනා ලද චාමර සම්පත් දසනායක නම් දේශපාලනඥයාට යළි එම තනතුරම ලබා දුන්නේ අධ්‍යාපනය නඟා සිටුවීමටද? මැර දේශපාලනය නගා සිටුවීමටද?
ආනමඩුව නවගත්තේගම විද්‍යාලයේ ගුරුවරියක දණගැස්වීයැයි වැරදිකරු වූ පළාත්සභා මන්ත්‍රී ආනන්ද සරත් කුමාර තමන්ගේ පක්ෂයේ ආනමඩුව සංවිධායක ලෙස පත් කරන ලද්දේ අපේ මැරයා අපට හොඳයි යන පිළිවෙත සනාථ කිරීමට නොවේද?
ජනාධිපතිවරණ සමයෙහි කුරුණෑගල කුඹුක්ගැටේදී සිරිසේනගේ ජනාධිපතිවරණ ව්‍යාපාරයට සහය දක්වමින් ගමන් කළ අපේ පරපුර කණ්ඩායමට පොලු පහරදී එම ප්‍රසංගය කඩා කප්පල් කළ කමල් ඉන්දිකට ශ්‍රී ලංකා නිදහස් පක්ෂයේ හිරියාල ආසනයේ සංවිධායක ධුරය පිරිනැමුවේත් ඒ ආරටම නොවේද?
මෙවැනි පත්කිරීම් මගින් සිදුවන්නේ මැර බලය සහ ප්‍රචණ්ඩත්වය සාධාරණය කිරීම නොවේද?
කතාව මරු! වැඩ නම් පූජකයාට ලැහැබෙදී වූ පාටමයි!
2020ට තව කල් තියෙනවා! මඩකළපු දේශනය කරලාම පෙන්වන්න.