නැගෙනහිර පළාත් සභාවේ බලය පිහිටුවා පවත්වාගෙන යෑම සඳහා පැහැදිලි බහුතරයක් ආණ්ඩුවට හෝ දෙමළ ජාතික සන්ධානයට නොමැතිවීම තුළ එම පළාත් සභාවේ බලය ලබාගැනීම සඳහා සහාය ලබාදෙන්නේ කාටද යන්න පිළිබඳව සැප්තැම්බර් 13 වැනිදා රාත‍්‍රී පත‍්‍රය මුද්‍රණයට යන අවස්ථාව වනවිටත් ශ‍්‍රී ලංකා මුස්ලිම් කොංග‍්‍රසය තීරණයක් ගෙන නොතිබුණද එම පක්ෂයේ ආරංචි මාර්ග ප‍්‍රකාශ කරන්නේ ආණ්ඩුවට සහාය දැක්වීමට තීරණය කර ඇති බවයි.

දැනට ආණ්ඩුව තුළ ශ‍්‍රී ලංකා මුස්ලිම් කොංග‍්‍රසය දරන ඇමති ධුර හා අනෙකුත් තනතුරු ආරක්ෂා කරගැනීම සඳහාත් නැගෙනහිර පළාත් සභාවේ බලය ආණ්ඩුවට ලබාගැනීම සඳහා සහාය දැක්වීම මගින් තව තවත් වරප‍්‍රසාද ආණ්ඩුවෙන් ලබාගැනීම සඳහාත් එවැනි තීරණයකට එළැඹිය හැකි බව එම ආරංචි මාර්ග වැඩිදුරටත් ප‍්‍රකාශ කරයි.

නැගෙනහිර පළාත් සභාව සඳහා ශ‍්‍රී ලංකා මුස්ලිම් කොංග‍්‍රසයෙන් තේරී පත්වූ අපේක්ෂකයන් හා පක්ෂයේ නායකත්වයේ පිරිස් අතර පැවති පළමු සාකච්ඡාවේදී සහාය ලබාදෙන්නේ කාටද යන්න තීරණය කිරීමට නොහැකි වූ අතර ඉන්පසුව රැස්වූ එහි උත්තරීතර මණඩලයටද ඒ සම්බන්ධයෙන් තීරණයක් ගැනීමට නොහැකි විය.

මුස්ලිම් කොංග‍්‍රසයේ දේශපාලන මණ්ඩලය මේ සම්බන්ධයෙන් තීරණයක් ගැනීමට සැප්තැම්බර් 15 වැනිදා රැස්වීමට නියමිත බව දැනගන්නට තිබෙන අතර බොහෝවිට එළැඹෙන සතියේදී පක්ෂයේ තීරණය ප‍්‍රකාශයට පත්වෙනු ඇතැ’යි දැනගන්නට ලැබේ.

ආණ්ඩුවද නැගෙනහිර පළාත් සභාවේ බලය පිහිටුවීම සඳහා සාකච්ඡා කිරීමට බැසිල් රාජපක්ෂ, අනුර ප‍්‍රියදර්ශන යාපා, සුසිල් පේ‍්‍රම්ජයන්ත් හා ඩලස් අලහප්පෙරුම ඇතුළත් කමිටුවක් පත්කර ඇති අතර ඔවුන් සමග මුස්ලිම් කොංග‍්‍රසය සාකච්ඡා කරනු ඇති බවද දැනගන්නට ඇත.

නැගෙනහිර බලය පිහිටුවීම පිළිබඳව අමාත්‍ය රිෂාඞ් බදියුදීන් හා ඒඑල්එම් අතාවුල්ලා අතරද සාකච්ඡා පැවැත්වී ඇති අතර එහිදී සාකච්ඡා වී ඇත්තේ මුස්ලිම් අපේක්ෂකයකුට නැගෙනහිර මහ ඇමති ධුරය හිමිවිය යුතු බවයි.