ටිරන් කුමාර බංගගමආරච්චි

නොබෝදා තේවත්ත ජාතික බැසිලිකාවේ දේව මෙහෙයකට එක්වෙමින් අගරදගුරුතුමෝ අපූරු කතා ටිකක් කීහ. ඒ කතා සියල්ල සිහිකිරීම වටී.


“පාස්කු ඉරිදා ප්‍රහාරයේ වරදකරුවන් කවුද කියලා තවමත් අපි ඇස් ඇරගෙන බලාගෙන ඉන්නවා. තමන්ගේ වගකීම ඉටු නොකළ දේශපාලනඥයන් සහ නිලධාරීන් කවුද කියලා හොයාගන්න එක තමයි දැනට පැවැත්වෙන වගවිභාගවීම තුළින් හොයාගෙන යන්නේ.


නමුත් මේ බෝම්බ තියපු අය මේවට සල්ලි දුන්නු අය, මේව පිටිපස්සේ ඉන්නේ කවුද කියන එක තාම හොයලා නැහැ. මේ සිද්ධිය පිටුපස ඉන්න අය හොයාගෙන යනව නම් වඩාත් හොඳයි. කියලා ජනාධිපති කොමිසමෙන් මම බලාපොරොත්තු වෙනවා.”


ගෝඨාභය ජනපතිවීමට පාස්කු ප්‍රහාරය දේව ආශිර්වාදයක් වූ බව කිව යුතුමය. එය රහසක්ද නොවේ. යහපාලනය වැඩ බැරි දාසලාගේ කල්ලියක් බව ඒත්තු ගන්වන්නට ඒ තරම් හොඳ උපහැරණයක් රාජපක්ෂලාට නොවීය. නැවත යුද උන්මාදය ජාතික ආලය, හැමදේම දෝර ගැලුවේ මේ පාස්කු ප්‍රහාරය නිසාය. නැවත බඩ නොව රට යන්න වැදගත් බව සිහිකිරීම මේ පිපිරුම් හේතුභූත විය. එයින් සිංහල බෞද්ධයා ඒකරාශි වූයේ දෙමළත්, මුස්ලිම් අයත් නැතිව රට පැවතිය යුතුය යන මතය දරාගෙනය. එයට ජීවය රාජපක්ෂලා අපූරුවට පිම්ඹේය. රනිල් සිරිසේන පාපතරයන් බව පාස්කුව මනාව ඔප්පු කළෝය. එහි සියලු බැට රනිල් ප්‍රමුඛ එජාපය අපූරුවටම භුක්ති වින්දේය.


එලෙස යහපාලනයට කැරකුණු පාස්කු ප්‍රහාරය රාජපක්ෂලාටත් භූමරංගයක් වේද? එදා කාදිනල්තුමා යනු දේව වාක්‍යයක් බව රාජපක්ෂලා ජනතාවට ඒත්තු ගැන්වූයේ හරි අපූරුවටය. කාදිනල්තුමාට එරෙහි වචනයක් කිව නොහැකි විය. කොටින්ම ඒ මොහොතේ කාදිනල්තුමාගේ මතවාදය එළිබැස්සේ පාස්කු ප්‍රහාරයට දඬුවම් දිය හැකි එකම බලවතා ගෝඨා ලෙසය. එය ඉතා අපූරුවට කාදිනල්තුමා ඉටු කළහ. එසේ නම් දැන් සිදුව ඇත්තේ කුමක්ද? ජනපතිවීමෙන් පසු අගමැතිවීමද, මහ මැතිවරණයෙන් තුනෙන් දෙකක්ම ලබාගෙන ඉටු කරගෙන ඇත. මේ මහ මැතිවරණයේ ජය පාස්කුව නිසා ලැබූවක් නොව, සිංහල බෞද්ධ නිසා ලැබූවකි. ගෝඨාත් ජනපති වී දිවුරුම් දුන්නේ තමා සිංහල බෞද්ධ ඡන්දවලින් ජය ගත් බව ප්‍රසිද්ධියේ කීමෙනි. එසේ නම් ඒ තුළත් පාස්කු ප්‍රහාරය පිහිට වී කතෝලික ඡන්ද ජයග්‍රහණයට හේතුවිණැයි සඳහනක් නොවීය. ඒ නිසා මේ ආණ්ඩුවට පාස්කු ප්‍රහාරය අමතක කිරීම මහ වැඩක්ද? ඡන්දයට පෙර බැඳුම්කරය ගැන කළ කතා අද කාට මතකද? ඒවා මතක් කර දෙමින් ඒ අයට දඬුවම් දිය යුතු යැයි සිහි කරන්නේ කවුද? ඒ නිසාම අද බැඳුම්කර මගඩියක් නැත. ඒ පවත් තනිකරම බලපෑවේ රනිල් ප්‍රමුඛ එජාපයටය. එදා බැඳුම්කර මගඩියෙන් ගත් මුදල් සිරිසේනගේ ඡන්ද වැඩවලටද වියදම් වුණා සහතිකය. සිරිසේන සමග ආ නඩයටත් ලැබුණා නියතය. සජිත්ගේ අයටත් ලැබුණා ස්ථිරය. එහෙත් පව පළ දුන්නේ රනිල් ප්‍රමුඛ එජාපයටය. එබැවින් අද බැඳුම්කරය ගැන කියනුයේ කවුද? රාජපක්ෂලාටත් ඒ ගැන වගේ වගක් නැත. එහෙත් පාස්කුව ගැන කියවිල්ල ඉවර නැත. පාස්කුවට සම්බන්ධ අයට දඬුවම් දෙන තාක් කාදිනල්තුමාට නින්ද යන්නේ නැත. එය හැම අතින්ම සාධාරණය. එනම් තම අනුගාමිකයන් මියයෑම ප්‍රධාන කරුණ වුවත් කාදිනල්තුමාගේ ප්‍රධාන කරුණ වුවත් කාදිනල්තුමාගේ ප්‍රධාන කරුණ එයට සාධාරණය ඉල්ලා නව ආණ්ඩු පිහිටුවීමය. කොටින්ම දේශපාලනය නොවන දේශපාලනයක නියැළීමය. එසේ නම් කාදිනල්තුමා දැන් කල්පනා කරනුයේ නම් මේ සියල්ලෙන් ගැලවෙනු ඇත්තේ තම ඉල්ලීම ඉටුවී අනුගාමිකයන් සතුටු වූ පසු බවය. ඒ නිසාම ඉතිරි කතා ටිකත් බලමු.


“මේ වැඩපිළිවෙළ පිටුපස්සේ ඉන්න අය කවුද කියලා හොයලා ඒ අයට දඬුවම් කරන්න කටයුතු කරනවා කියලා අපිට දුන්නු පොරොන්දුව ඉෂ්ට කරාවි කියලත් අපි බලාපොරොත්තු වෙනවා.”


එසේ නම් දැන් ගිවිසුම පැහැදිලිය. මේ ආණ්ඩුවට පාස්කුව භූමරංගයක් වී ඇත. කාදිනල්තුමා කරදරයක් බවට පත්වන තැනට පත්ව ඇත.


“මේ සිද්ධියට සම්බන්ධ වුණ මේ වගේ දේවල් කරන්න රහසිගතව කුමන්ත්‍රණය කළ අයට දඬුවම් දෙයි කියලා බලාපොරොත්තුවෙනවා.”


“එහෙම කරන්නේ නැතිව යම්කිසි රජයක් ඒ අය හිමිහිට හංගලා එළියට දාන්න කටයුතු කරනව නම් ඒ රජයට මම විරුද්ධත්වය ප්‍රකාශ කරනවා. ඉස්සෙල්ල තිබුණ ආණ්ඩුව මේක හරියට විමර්ශනය කළේ නැහැ. හොඳටම කරුණු දැනගෙන ඉන්දැද්දිත් ඒ ගැන මුකුත් කළේ නැහැ. තාමත් ඇඟ බේරා ගන්න හදනවා.”


“මෙච්චර දැනගෙන ඉඳලත් ජනාධිපති කොමිසමට ගිහින් නිලධාරීන් කඳුළු වගුරන එක වැඩක් නැහැ. ඒවා කිඹුල් කඳුළු. ඒ වෙලාවේ තමන්ට පැවරෙන වගකීම ඉටු කළේ නැත්තේ ඇයි? එහෙම නොකරපු නිලධාරීන්ගේ නිල ඇඳුම් ගලවලා දාන්න ඕන.”


මේ කියන්නේ කුමක්ද?


කාදිනල්තුමාගේ කතා සාරය අවසානයේ කියනුයේ කුමක්ද? ගියවර ආණ්ඩුව මේ ගැන නිසි විමර්ශන කළේ නැත යන්න වගේම දැනට වන විමර්ශන ගැනත් එතුමන් තුළ විශ්වාසයක් නැති බව නොවේද? එමෙන්ම පාස්කු ප්‍රහාරයට වගකිවයුතු කවුද යන්න විශ්වාසයක් කාදිනල්තුමා සතුව වන අතර එය එතුමන් අදහන බව පැහැදිලිය. ඒ අනුව කාදිනල්තුමා ඉල්ලන මේ මස් රාත්තල කුමක්ද? සිරිසේන, රනිල් මුලින්ම මීට වගකිවයුතු බවත්, මුලින්ම දඬුවම් පැමිණිය යුත්තේ ඔවුන්ට බව නොවේද? බදියුදීන් ඒ අතර සිටිය යුතු බව නොවේද? යම්කිසි අය හංගලා අනෙක් අයව දාන්න එපා කියනුයේ දේශපාලකයන් ගැන නොවේද?


සැබැවින්ම ඒ සිද්ධිය දෙස බලන ඕනෑම කෙනකුට මුලින්ම එහි වරද පැටවිය යුත්තේ සිරිසේන රනිල් රුවන් යන අයට බව සිතීම වරදක්ද? ඇත්තටම ඔවුන් ඒ ගැන නිසි විමර්ශනයක් නොකළ බවත් සහතිකය.


සිරිසේනගේ මැදිහත්වීම


ඉතාම නරක තක්කඩිම රංගනයක නියැලුණු සිරිසේන පාස්කු සිද්ධිය කල්තියා දැන සිටි බව අද වනවිට ප්‍රසිද්ධ රහසකි. එහෙත් එදා ඔහු කළේ සුදනා වී මලල්ගොඩ කමිටුව පත්කිරීමය. එය ජනාධිපති සිරිසේන පත් කළ මලල්ගොඩ කමිටුවේ ශ්‍රේෂ්ඨාධිකරණ විනිසුරු මලල්ගොඩ මහතා ඇතුළු පිරිසක් විය. මෙම කමිටුවට කිසිදු නෛතික බලයක් නොමැති නිසාත්, ලැබුණු කාලය ප්‍රමාණවත් නොවන නිසාත් දීර්ඝ වශයෙන් හා ගැඹුරින් පරීක්ෂණ කිරීමට නොහැකි වූ බව එහි කමිටු සාමාජිකයකු වූ හිටපු පොලිස්පති ඉලංගකෝන්ම පවසා තිබුණි. එහෙත් ප්‍රශ්නය එහෙව් බලයක් නැති නිසි අධ්‍යයනයක් නොවුණු කමිටු වාර්තාව පදනම් කරගෙන නඩු තීන්දු දිය නොහැකි වුවත් සිරිසේනගේ වුවමනාවට නීතිපති එදා ඒ දේ කිරීමය. ඒ සිරිසේන පාස්කු ප්‍රහාරයෙන් තම පව් සෝදා ගත් විදිහය.


රනිල්ගේ මැදිහත් වීම


රනිල් මෙම ප්‍රහාරය ගැන සොයා බැලීමට පාර්ලිමේන්තු විශේෂ තේරීම් කාරක සභාවක් පත් කළේය. එහි ප්‍රධානත්වය දැරුවේ නියෝජ්‍ය කතානායක ආනන්ද කුමාරසිරිය. එහි අවසාන ප්‍රතිඵලය වූයේ කුමක්ද? එය කාටවත් පැහැදිලි නැත. ජනපතිත්, අගමැතිත් වගකීම පැහැර හැර ඇති බවට කරුණු ඇති වැනි කතාවක් ඒ තුළ විය. මේ සියලු නාඩගම්වලින් සිදුවූයේ යහපාලනය මිනිස්සු අතරේ අන්තෙටම පිරිහීමය. පාස්කු පිහිටෙන් ගෝඨා ජනපතිවීමය.


කාදිනල්තුමාට පිළිතුරු ලැබේද?


අද කාදිනල්තුමා කුමක් කීවද එය රාජපක්ෂලා එතරම් තකන්නේ නැත. අලි සබි්‍ර අධිකරණ ඇමතිවීමෙන්ම එය කාදිනල්තුමාට පැහැදිලි වූහ. එහෙත් දැන් විකල්පයක් නැත. එකම විකල්පය ඉල්ලා සිටීමය. රාජපක්ෂලාට සිරිසේනට දඬුවම් දිය හැකිද? රනිල්ට දඬුවම් දිය හැකිද? මේ දෙදෙනාම එදා රාජපක්ෂලාව කොතෙක් රැක්කේද? ඒ අනුව මෙවරත් සිදුවන්නේ සිරිසේනගේ කමිටුව කළා පන්නයේම විගඩමකි. එය අකමැත්තෙන් හෝ ඉවසා වැදෑරීම හැර වෙන කිසිදු දෙයක් කාදිනල්තුමාට නොලැබෙනු ඇත. අද පාස්කු ප්‍රහාරය වෙනුවෙන් දතට දතක් ඉල්ලන කාදිනල්තුමා ඉතා ඉක්මනින්ම අනෙක් කම්මුලද හරවනවා නියතය. මේ දේශපාලනයේ ස්වභාවය බව කාදිනල්තුමා නොදන්නවා නොවේ. නොදන්නා සේ හිඳිනවා පමණි.

1 COMMENT

  1. oya bomb blast eka kale rajapaksha pwulama thamayi. sirisenath sambandayi okata. oka anthimata isis ekata wagakima baradeyi. epamanayi thinduyi niwaranayi. oka oya kadinal wandi battayath dannawa.

LEAVE A REPLY

Please enter your comment!
Please enter your name here