ඉඳුනිල් උස්ගොඩ ආරච්චි


කොවිඞ් 19 ආසාදිතයන් හඳුනා ගැනීමට දැනට මෙරට තුළ සිදුකරන PCR (Polymerase Chain Reaction) ක්‍රමවේදයට අමතරව තවත් පරීක්ෂණ ක්‍රමවේදයක් රැගෙන ඒම හදිසියේම මෙන් පසුගිය දිනවල සිදුවූ බව වාර්තා වූයේය. ඒවා නම් ක්ෂණික ප්‍රතිදේහ ජනක පරීක්ෂණ කට්ටල (Rapid Antigen Test Kit) යි. මේ සම්බන්ධයෙන් ඉතා කඩිනමින් කටයුතු සිදුවන්නේ දැනට පවතින පීසීආර් පරීක්ෂණ ක්‍රියාවලිය විධිමත් කිරීමට අවශ්‍ය අමුද්‍රව්‍ය හා පහසුකම් සපයා ගැනීම සම්බන්ධයෙන් ද ධාරිතාවය වැඩිකර ගැනීමට ගත හැකි ක්‍රියාමාර්ග සම්බන්ධයෙන් ද කථිකාවක් ගොඩනැගී තිබූ පරිසරයකය.


ක්ෂණික ප්‍රතිදේහ ජනක පරීක්ෂණ මොනවා ද?


ලෝක සෞඛ්‍ය සංවිධානය විසින් පවසන්නේ සෙම පටලයක ඇති SARS-CoV-2 වෛරස් ප්‍රෝටීන සෘජුවම හඳුනා ගැනීම සිදුවන බැවින් පීසීආර් පරීක්ෂණ වලට වඩා ක්ෂණික ප්‍රතිදේහ ජනක පරීක්ෂණය සරළ සහ වේගවත් බවය. කෙසේ වෙතත් මෙම ක්‍රමවේදය සාපේක්ෂව සැලකිය යුතු මට්ටමකින් අඩු සංවේදී ක්‍රමවේදයක් වන නමුත් සුදුසු වටපිටාවන් තුළ දී ඉක්මන් ප්‍රතිඵල ලබා ගැනීම වෙනුවෙන් භාවිතා කළ හැකි මිල අධික නොවන හා කල්තියා හඳුනාගත හැකි ක්‍රමවේදයක් බව ද ලෝක සෞඛ්‍යය සංවිධානය සඳහන් කරයි. මෙම ක්ෂණික ප්‍රතිදේහ ජනක පරීක්ෂණය/ රැපිඞ් ඇන්ටිජන් ටෙස්ට් මගින් සිදුකරනුයේ කෙනෙකුගේ ශරීරයට ඇතුලුවී ඇති කොවිඞ් වෛරසයට සුවිශේෂී ප්‍රෝටීන ව්‍යුහයක් පිළිබඳ සලකා බැලීමෙන් එම වෛරසය ශරීරයේ තිබෙනවා ද නැද්ද යන්න පරීක්ෂාවට ලක් කිරීමය. සෙම පටලයක් සඳහා මෙම පරීක්ෂණය සිදු කරනු ලබන අතර එම සෙම පටලයට වෛරසය ඇතුලුවී තිබේද නැද්ද කියන කාරණය මත ද පරීක්ෂණය වෙනස් විය හැකිය. එමෙන්ම එය ඉතාම සරළ පරීක්ෂණයක් බවට පත් කර තිබෙන බැවින් ක්ෂේත්‍රගතව සහ සීමාසහිත අවස්ථා සඳහා භාවිතා කළ හැකි පරීක්ෂණයකි. කෙසේ වෙතත් එහි ප්‍රතිඵල නැවත තහවුරු කරගැනීමකින් තොරව රෝගියකු සම්බන්ධයෙන් කටයුතු කිරීමේ හැකියාවක් නැති බව එම පරීක්ෂණ කට්ටල නිෂ්පාදනය කරනු ලබන සමාගම් විසින් ද සඳහන් කරනු ලබන්නේය.


ඒ සියලු කරුණු පදනම් කරගත් විට පෙනෙනුයේ ක්ෂණික ප්‍රතිදේහ ජනක පරීක්ෂණ යනු පීසීආර් පරීක්ෂණ හෝ මෙතෙක් රසායනාගාර තුළ සිදුකළ පරීක්ෂණ නතර කර ඒ වෙනුවට කළ යුතු ක්‍රමවේදයක් නොවන බවය. වෛද්‍ය රසායනාගාර සේවාවේ විද්වතුන් සඳහන් කරනුයේ වෛද්‍ය රසායනාගාර සේවාව ලෙස ද ක්ෂණික ප්‍රතිදේහ ජනක පරීක්ෂණයකින් ලැබෙන ප්‍රතිඵලයක් නැවත පීසීආර් පරීක්ෂණයක් සිදුකර හෝ තහවුරු කරගන්නා තුරු රෝගියෙකුට ප්‍රතිකාර කිරීමට හෝ රෝගියා පිළිබඳ තීරණ ගැනීමට භාවිතා නොකරන බවය. එමෙන්ම වෛරසය ශරීරගත වූ පළමු දිනයේ සිට හත්වන දිනය දක්වා පමණක් ක්ෂණික ප්‍රතිදේහ ජනක පරීක්ෂණ කට්ටල වලින් නිවැරදි දත්ත ලබා ගත හැකි අතර ඉන් පසු ආසාදිතයන් සම්බන්ධයෙන් ලබාදෙන දත්ත නිවැරදිභාවයෙන් තොර බව එම නිෂ්පාදනවලම සඳහන්ය. ඊට හේතු වන්නේ යම් අයෙකුගේ සිරුර තුළ ප්‍රතිදේහ ජනකයක් රැඳී තිබෙන්නේ පළමු දින හත තුළ පමණක් වන අතර ඉන් පසු ශරීරය තුළ ප්‍රතිදේහ නිපදවා ප්‍රතිදේහ ජනකය අවශෝෂණය වීම සිදුවන බැවින් දින හතකට පසු සිරුර තුළ තිබෙන්නේ ප්‍රතිදේහ පමණි. එවන් තත්ත්වයක් තුල තනි උපක්‍රමයක් ලෙස භාවිතා කළ නොහැකි ප්‍රතිදේහ ජනක පරීක්ෂණ සම්බන්ධයෙන් මෙරට තුළ විශාල සංවාදයක් හදිසියේම මෙන් ඇති වීමේ පදනම කුමක් දැයි කියා සොයා බැලිය යුතුව ඇත.

කලබලයේ පරීක්ෂණ කට්ටල ගෙන්වීම


පසුගිය දිනක ඖෂධ නිෂ්පාදනය, සැපයීම් හා නියාමන රාජ්‍ය අමාත්‍ය චන්න ජයසුමන පැවසුවේ කොවිඞ් වෛරසය හඳුනාගැනීමට කඩිනම් ඇන්ටිජන් පරීක්ෂාවක් යොදාගත හැකි බව ලෝක සෞඛ්‍ය සංවිධානය කියා තිබෙන බවත්, දැනට ලෝකයේ එක් ආයතනයක් පමණක් රැපිඞ් ඇන්ටිජන් පරීක්ෂණ කට්ටල නිෂ්පාදනය කරන බවත් ඉතා ඉක්මනින් එම තාක්ෂණය යොදා ගැනීමට මෙරට ද තීරණය කළ බවත්ය. ඔහු පැවසුවේ ලෝක සෞඛ්‍ය සංවිධානයෙන් පරිත්‍යාගයක් ලෙස ලැබෙන රැපිඞ් ඇන්ටිජන් කට්ටල මේ වන විටත් රැගෙන එමින් පවතින බවය. කෙසේ වෙතත් ඒ අවස්ථාව වන විට ද මෙරට තවත් පෞද්ගලික සමාගමක් විසින් ද මෙම පරීක්ෂණ කට්ටල ගෙන ඒමට කටයුතු කර තිබූ බව අනාවරණය වී තිබුණි. චන්න ජයසුමන රාජ්‍ය අමාත්‍යවරයා ඒ සම්බන්ධව පැවසුවේ ලෝක සෞඛ්‍ය සංවිධානය හරහා ලැබෙන පරිත්‍යාගයට මුල් තැන දෙන බවත් මදි පාඩු තිබේ නම් පෞද්ගලික ආයතනයකින් හෝ මිල දී ගැනීමට කටයුතු යොදන බවකි.


“පීසීආර් පරීක්ෂණ සම්බන්ධයෙන් සහ ඒ සම්බන්ධයෙන් පවතින මාෆියාව පිළිබඳ පසුගිය කාලයේ දිගින් දිගටම අපි කතා කරමින් හිටියා. එක් කණ්ඩායමක් විසින් තෝරාගත් පීසීආර් ප්‍රතික්‍රියක වර්ගයක් දිගින් දිගටම වැඩි මුදලට ගෙන්වාගෙන ව්‍යාපාරයක් කරගෙන ගියා. වෙනත් කිසිදු වර්ගයක ප්‍රතික්‍රියකයකට වෙළඳපොළට ඇතුලු වීමට ඉඩ දී නැහැ. ජාත්‍යන්තරව ද කිසිදු ස්ථානයකින් නිර්දේශයක් නොමැති වුවත් හදිසි අවශ්‍යතාව මත ඒ සඳහා අවසරය ලබා දීම සමග මේ වන විටත් දිගින් දිගටම එම ප්‍රතික්‍රියකම ලබා ගැනීම සිදුවෙනවා. එකක් ඒවා සායනික පරීක්ෂණ සඳහා වලංගු කර ඒවා විධිමත් ක්‍රමයකට ඇවිත් නැහැ. අනෙක් දේ ඒවා මිලත් අධිකයි. ඒ සම්බන්ධයෙන් වූ සංවාදය ප්‍රයෝජනයට ගනිමින් දැන් මේ රැපිඞ් ඇන්ටිජන් පරීක්ෂණ කට්ටල (ක්ෂණික ප්‍රතිදේහ ජනක පරීක්ෂණ කට්ටල) ගෙන ඒමේ ව්‍යාපාරයක් ඇවිත් තිබෙනවා. පීසීආර් ප්‍රතික්‍රියක ගෙන්වීම වෙනුවෙන් ටෙන්ඩර් කැඳවීම ඔක්තෝබර් 02 සිට සිදුවුවත් ඒ සම්බන්ධයෙන් තවමත් කිසිදු ක්‍රියාමාර්ගයක් ගෙන නැති පසුබිමක ක්ෂණික ප්‍රතිදේහ ජනක පරීක්ෂණ කට්ටල ගෙන්වීමට කලබලයක් හදාගෙන තිබෙනවා. මේ කලබලය ලෝක වසංගත තත්ත්වය පාලනය කිරීමට තිබෙන දැවැන්ත වැඩසටහන් ලෙස පෙන්වීමට උත්සාහ කළත් වෛද්‍ය රසායනාගාර සේවාවේ කොරෝනා වසංගතය මර්දනය කිරීමට ඇති උපක්‍රම වලට අනුව ක්ෂණික ප්‍රතිදේහ ජනක පරීක්ෂණ කියන්නේ පිදුරු ගහක්. පිදුරු ගහ අපට අවශ්‍ය වෙන්නේ දියේ ගිලෙන්න යන විටයි. නමුත් තවම අපි ඒ තත්ත්වයට ඇවිත් නැහැ, ඒ නිසා ඒවා සූදානම් කර තැබීම සුදුසු වුණත් ඒ වන තෙක් ප්‍රතිදේහ පරීක්ෂණ සහ පීසීආර් පරීක්ෂණ වලින් මේක කරගෙන යෑමේ හැකියාව තිබෙනවා. ඒක වඩා සාර්ථකයි.” ඒ, වෛද්‍ය රසායනාගාර විද්‍යාඥ වෘත්තීයවේදීන්ගේ ආයතනයේ සභාපති රවී කුමුදේශ්ය. ක්ෂණික ප්‍රතිදේහ ජනක කට්ටල ගෙන්වීම වෙනුවෙන් ඔක්තෝබර් 29 වන දා ටෙන්ඩර් කැඳවා දින තුනක නිවාඩුව පසුවූ නොවැම්බර් 2 වන සඳුදා ටෙන්ඩර් කැඳවීම අවසන් කිරීමත් එම කාලය තුළ බස්නාහිර පළාතට ඇඳිරි නීතිය ක්‍රියාත්මක කාලය වීමත් නිසා එවැනි ටෙන්ඩර් කැඳවීමක් කිරීමට නම් ඉතා හදිසි අවශ්‍යතාවයක් තිබිය යුතු බව රවී කුමුදේශ් පවසයි. එවැනි හදිසි රැපිඞ් පරීක්ෂණ කට්ටල ගෙන්වීමේ අවශ්‍යතාවක් නොතිබූ බවත් ලෝක සෞඛ්‍ය සංවිධානය විසින් ද මෙරටට අවශ්‍ය පරීක්ෂණ කට්ටල එවීමට කටයුතු කරමින් තිබූ බවත් ඔහු පවසයි.


‘ හදිසියේම මෙන් හිටපු නියෝජ්‍ය අධ්‍යක්ෂ ජෙනරාල් (රසායනාගාර සේවා) විසින් මෙම පරීක්ෂණ කට්ටල ගෙන්විය යුතු බව පැවසීමත් ඉන් දින කීපයක් ඇතුලත නිවාඩු දින කීහිපයේ ටෙන්ඩර් කැඳවා අවසන් කිරීමත්, ඒ වන විටත් නිර්දේශයක් ලබා ගැනීමට ගෙන්වූ කිසිදු සාම්පලයක් න්‍යායාත්මකව ලංකාව තුල නොතිබිය යුතු බැවින් ඒ වන විට ඖෂධ තත්ත්ව පාලන අධිකාරයෙන් සාම්පල ගෙන්වීමට කිසිදු සමාගමකට අවසර ලබා දී තිබිය යුතු බවත් වෛද්‍ය රසායනාගාර විද්‍යාඥ වෘත්තීයවේදීන්ගේ ආයතනය මතු කරයි. ඒ අනුව ටෙන්ඩර් කැඳවූයේ ද 29 වන දින සිට එය අවසන් වූ නොවැම්බර් 2 වන දා වන විට කිසිවෙකුට සාම්පල ගෙන්වීමට ද හැකියාවක් නැති නමුත් එක් ආයතනයකට පමණක් ඒ වන විටත් සාම්පල තිබී ඇති අතර ඊ නිර්දේශ ලබාදීමේ ක්‍රියාවලිය ද සිදුවෙමින් තිබීම සම්බන්ධයෙන් වෛද්‍ය රසායනාගාර විද්‍යාඥ වෘත්තීයවේදීන්ගේ ආයතන ප්‍රශ්න කරයි. කෙසේ වෙතත් මෙම ටෙන්ඩර් කැඳවීමේ දී දැනට අනුමැතිය ලැබී ඇති සමාගමට අමතරව තවත් සාමාගම් 31ක් අයදුම් කර තිබුණි.


“ඇන්ටිජන් පරීක්ෂණය සම්බන්ධයෙන් හදිසියේ මේ අවස්ථාවේ ලොකු කතාබහක් ඇති කිරීමට සමහර බලධාරීන් කටයුතු කළේ ඇයි, ඒ වගේම වලංගුභාවය සම්බන්ධයෙන් නිර්දේශ ලබා දීමට පෙර ලංකාවට ගෙන්වා තිබේ නම් ඒ ඇයි කියන දේත්, ඒ සඳහා කොපමණ මුදලක් වියදම් වුණා ද ඇතුලු මේ සමස්ත ක්‍රියාවලිය සම්බන්ධව පාරදෘශ්‍ය තොරතුරු රටට ඉදිරිපත් කිරීම වැදගත්. ඒක මිනිස්සුන්ගේ විශ්වාසය එක්ක ඉදිරියට යන්න නම් ඒ පාරදශ්‍යභාවය තිබිය යුතුයි.” ඒ රජයේ වෛද්‍ය නිලධාරීන්ගේ සංගමයේ සංස්කාරක වෛද්‍ය හරිත අලුත්ගේය.


ගෙන්වීමේ ක්‍රියාවලියේ අක්‍රමිකතා


මෙරටට ඖෂධ හෝ ඊට අදාල උපකරණ ආදිය ගෙන්වීමේ දී ඒවාට ජාත්‍යන්තර වශයෙන් කුමන ආයතනයකින් අනුමැතිය ලැබී තිබුණ ද එය මෙරටට ගෙන්වීමට පෙර ඖෂධ තත්ත්ව පාලන අධිකාරයෙන් අවසර ලබාගත යුතුය. එසේ අවසරයක් ලබා ගැනීමට නම් ගෙන්වීමට ප්‍රථම ඒවා කෙතරම් දුරට මෙරටට උචිත දැයි නිර්දේශ කිරීම සඳහා සාම්පලයක් පමණක් ගෙන්වීම සඳහා බලපත්‍ර ලබා දිය හැකිය. සාම්පල ගෙන්විය හැකි වන්නේ ද ඒවා පරීක්ෂා කිරීම සඳහා පමණි. ඒවා ගෙන්වීමට ද එම නිෂ්පාදනය සාදන ක්‍රමවේදය හා තාක්ෂණික සැලසුම සම්බන්ධයෙන් ලිපි ලේඛන ඖෂධ තත්ත්ව පාලන අධිකාරයට ලබා දිය යුතුය. එම ලිපිගොනුවලට අදාලව පළමු නිර්දේශය ලබා දිය යුතුය. ඒ අනුව ලබා දෙන නිර්දේශයට අනුව අවසර නොදීම හෝ එසේත් නැත්නම් එය වලංගුභාවය (Validation Process)තහවුරු කිරීමේ පරීක්ෂාවකට ලක්වීම සිදුවෙයි. ඒ අවස්ථාවේ දී සාම්පල නියැදිය විවිධ ක්‍රමවේද මගින් පරීක්ෂාවට ලක්කර එම පරීක්ෂාවෙන් ද සමත් වුවහොත් ඒවා ගෙන්වීමේ බලපත්‍ර ලබා දීම සිදුවිය යුතුය.


එවැනි ක්‍රියාපටිපාටියක් තිබුණ ද මේ වන විට එම වලංගුභාවය නිර්ණය කිරීම් නිසි ලෙස කළ ද නොකළ ද ඒවා සිදුකිරීමට සිටින විශේෂඥ වෛද්‍යවරුන් ඒ සම්බන්ධයෙන් පවසන දේ මත ද එම ක්‍රියාවලිය විකෘති කරමින් කටයුතු සිදුවන බවත් ඒ මගින් තමන්ට අවශ්‍ය අයට පමණක් මේවා ගෙන්වීමට අවස්ථාව ලබා දීමටත් අනවශ්‍ය අයට නොදීමටත් කටයුතු සිදුවන බවට වෛද්‍ය රසායනාගාර විද්‍යාඥ වෘත්තීයවේදීන්ගේ ආයතනය චෝදනා නගයි. ඔවුන් පවසන්නේ රසායනාගාර ප්‍රතිපත්තියට අනුව ඕනෑම රසායනාගාරයක තහවුරු කිරීමේ හා පරීක්ෂා කිරීමේ භාරකරු ලෙස රසායනාගාර සේවා අධ්‍යක්ෂ ජෙනරාල් වෙනුවට නියෝජ්‍ය අධ්‍යක්ෂ ජෙනරාල් සිටිය ද මේ වන විට ඊට අදාලව විධිමත් යාන්ත්‍රණයක් නොමැති බැවින් ඖෂධ තත්ත්ව පාලන අධිකාරිය තමන්ට හිතෛෂී අය පත් කිරීමේ තත්ත්වයක් නිර්මාණයක කරගෙන ඇති බවය.


ඖෂධ තත්ත්ව පාලන අධිකාරිය විසින් ක්ෂණික ප්‍රතිදේහජනක පරීක්ෂණ කට්ටල ගෙන්වීම සඳහා එක ආයතනයකට පමණක් බලපත්‍රයක් නිකුත් කර තිබෙන්නේ ඔක්තෝබර් 22 දාය. එමෙන්ම එම ආයතනයට පමණක් එලෙස බලපත්‍රයක් නිකුත් කළේ කෙසේද යන ගැටලුව මතු වන්නේය. එමෙන්ම අප්‍රේල් සිට ඔක්තෝබර් දක්වා කාලය තුළ ආයතන හැටකට වැඩි සංඛ්‍යාවක් ඖෂධ තත්ත්ව පාලන අධිකාරියෙන් නිදර්ශක ගෙනවිත් තහවුරු කරගැනීමේ පරීක්ෂණයට අවසර ඉල්ලා තිබුණත් ඒ කිසිවකට අවසර ලැබී තිබුණේ ද නැත. ප්‍රතිදේහ පරීක්ෂණ කට්ටල ගෙන්වන ආයතන ද ගණනාවක් විසින් ඇමරිකාවේ ඖෂධ හා ආහාර නියාමන අධිකාරිය විසින් අනුමත කරන ලද නිෂ්පාදන ගෙන්වීමට අවසර ඉල්ලා තිබුණත් ඒවාට අවසර ලැබී නැත. 28 වන දා ටෙන්ඩර් කැඳවන විට ද ආයතන තිහකට ආසන්න සංඛ්‍යාවක් ඒ සඳහා ඉල්ලුම් කර තිබූ අතර , 2 වන දා මෙම ටෙන්ඩරය සම්බන්ධයෙන් කටයුතු කර තිබූ අතර සාම්පල නිර්දේශ කිරීමේ කටයුතු ආරම්භ වී තිබුණත් අනෙක් කිසිදු ආයතනයකට සාම්පල ගෙන්වීමට අවසර ලැබී නැත.


“ඖෂධ තත්ත්ව පාලන අධිකාරිය මෙහිදී නිවැරදි පරීක්ෂණයක් කළ යුතුයි. පීසීආර් පරීක්ෂණයත්, ප්‍රතිදේහ පරීක්ෂණයත් මේ රැපිඞ් පරීක්ෂණයත් එකම රෝගියා සඳහා සිදුකර ප්‍රතිඵල ලබාගත යුතුයි. ඒවා අනුව මේවාගේ නිරවද්‍යතාව පරීක්ෂා කළ යුතුයි. නමුත් එවැනි ක්‍රියාවලියකට අවශ්‍ය සාම්පල ගෙන්වීමේ අවසරයක් ලබා දී තිබුණේ නැහැ. අනෙක් අයටත් දීලා තිබුණේ නැහැ. එසේ නමුත් එක ආයතනයක් සාම්පල ගෙන්වා තිබෙනවා. එක්කෝ ඒක හොරෙන් ගෙනත් හෝ ඒ ආයතනයට හොරෙන් අවසර දීමක් සිදුවෙලා තියෙනවා. ගැටලුව තිබෙන්නේ බලපත්‍ර ලබා දුන් ආකාරය සම්බන්ධවයි. එක් ව්‍යාපාරිකයෙකුට පමණක් මෙහිදී ඉදිරියෙන් ගොස් බලපත්‍ර ලබා ගැනීමට හැකි වී තිබෙනවා. එයට පිළිතුර ලෙස ඖෂධ තත්ත්ව පාලන අධිකාරිය පවසන්නේ ලෝක සෞඛ්‍ය සංවිධානය විසින් මේකට අනුමැතිය දී ඇති බැවින් එයට අනුමැතිය ලබා දුන් බවයි. නමුත් ලංකාව තුල එවැනි භාවිතාවක් නැහැ. ලෝකයේ විශාල වශයෙන් එවැනි උපකරණ හා ඖෂධ නිෂ්පාදනය කරන නිසා ඒවා ලංකාව තුලත් පරීක්ෂණයට ලක් කරනු ලැබීම සිදුවුණා. රැපිඞ් පරීක්ෂණ සම්බන්ධයෙන් විවිධ රටවලට ලැබෙන්නේත් විවිධ ප්‍රතිඵලයි. ඇමරිකාවේ මැතිවරණය ඉලක්කය කරගෙන මෙහි අවශ්‍යතාව තිබූ හේතුවත් සමග ලෝක සෞඛ්‍ය සංවිධානය සඳහන් කර තිබුණේ හදිසි අවශ්‍යතාවයන් සඳහා එය සුදුසු බවට නිර්දේශ කළත් මෙම පරීක්ෂණ කට්ටල සම්බන්ධයෙන් ලෝක සෞඛ්‍ය සංවිධානය බරපතල පරීක්ෂණ සිදුකර නිර්දේශ නිකුත් කර නැහැ.”


පීසීආර් වලට වඩා වැදගත් කර ගැනීම


ඔක්තෝබර් 02 වන දා ද ටෙන්ඩර් කැඳවීමක් සිදුකර තිබුණේ පීසීආර් ප්‍රතික්‍රියක ගෙන්වීම සඳහාය. පීසීආර් සම්බන්ධයෙන් වන ප්‍රධාන ගැටලු වූයේ ඒ සඳහා වැයවන මුදල සහ ප්‍රතික්‍රියකවල සැපයුම් පද්ධතියේ ගැටලු ය. පීසීආර් පරීක්ෂණ ප්‍රමාද වීමට මූලික හේතු ද ඒවා බව ඒ සම්බන්ධ විශේෂඥයෝ ද පැවසූහ. ඊට පිළියම ලෙස රැපිඞ් කට්ටල ගෙන්වීම සඳහා ටෙන්ඩර් කැඳවීමට පෙර පීසීආර් ප්‍රතික්‍රියක ගෙන්වීමට කැඳවූ ටෙන්ඩරයේ සැපයුම්කරුවන් ලෙස ඉල්ලා ඇති ඇතැම් ඒවාට එෆ්බීඒ, ඩබ්එච්ඕ, එච්එස්ඒ ආදියෙහි නිර්දේශ ගණනාවක් ද ඖෂධ තත්ත්ව පාලන අධිකාරියේ ලියාපදිංචිය හා නිර්දේශය ද තිබුණත් ඒවා ගෙන්වීම සම්බන්ධව නිර්දේශ ලැබී තිබුණේ නැත. එමෙන්ම පීසීආර් සහ රැපිඞ් අතර මිලෙහි වෙනස ද ගණනය කළ විට රුපියල් තුන්සිය ගණනකි. එවන් පසුබිමක පීසීආර්ප්‍රතික්‍රියක ගෙන්වීමේ ක්‍රියාවලිය සම්බන්ධව තවමත් සෞඛ්‍ය අමාත්‍යාංශය විසින් කඩිනම් පියවර ගෙන නැත. ඒ සඳහා ලෝක බැංකු ආධාර ද ලැබී තිබිය දී ඒ කිසිදු පරීක්ෂාවක් නොමැති රැපිඞ් පරීක්ෂණ ගෙන්වා පරීක්ෂණ කටයුතු ද ආරම්භ කිරීමේ සූදානමක් දැන් තිබෙන්නේය. එමෙන්ම මෙවැනි ප්‍රතිදේහජනක කට්ටල විවිධ රටවලින් ද ප්‍රදානයන් ලෙස මෙරටට එවා තිබුණත් ඒවා ද ගුවන්තොටුපොළෙන් හෝ වරායෙන් නිදහස් කර නොගෙන තිබුණේ ඒවා රටේ භාවිතා නොකරන බව පවසමිනි. ඒ ප්‍රතිදේහජනක භාවිතා නොකරන ප්‍රතිපත්තියක සිටි බැවින් විය යුතුය. නිසි සූදානමක් තිබීම වැදගත් යැයි සලකමින් ප්‍රතිදේහජනක සලකා බැලිය යුතු මතවාදයේ සෞඛ්‍ය ක්ෂේත්‍රය අතුරින් මුල් කාලයේ සිටම සිටියේ ද වෛද්‍ය රසායනාගාර විද්‍යාඥ වෘත්තීයවේදීන්ගේ ආයතනය පමණක් බව පෙනුණි.

පීසීආර් සඳහා අවශ්‍ය ප්‍රතික්‍රියක වලට තිබෙන සැපයුම නතර කිරීමට උත්සාහ කරමින් හා වෙනත් පරීක්ෂණ කට්ටල එක සමාගමකට අවස්ථාව ලබාදී ගෙන ඒමේ ක්‍රියාවලියක් දියත් කිරීම හරහා ලාභදායී මෙන්ම වෙනත් හොඳ නිෂ්පාදන ලබා ගැනීමේ අවස්ථා තිබේ නම් ඒවා ද මගහැරී යන්නේය. එබැවින් සෞඛ්‍ය අමාත්‍යාංශය මේවා සම්බන්ධයෙන් නිසි විමර්ශනයක් සිදුකළ යුතුව තිබෙන්නේ. වසංගතය අතරතුර සිදුකරමින් තිබෙන මෙවැනි වෙළඳ මාෆියාවලට සෞඛ්‍ය අමාත්‍යාංශයේ බලධාරීන් සෘජු ලෙසම මැදියත්වී කඩිනම් පියවර ගත යුතුව තිබේ. පීසීආර් නතර කර හෝ එහි තිබෙන ඒකාධිකාරය තබාගෙන සෞඛ්‍ය අමාත්‍යාංශය විසින් රැපිඞ් ඇන්ටිජන් පරීක්ෂණ සඳහා මාරු වීම සමාජ යහපත උදෙසා වූවක් නොවන බව පෙනී යන බැවින් ඒ සම්බන්ධ නිසි අවධානය යොමුවිය යුතුය.

LEAVE A REPLY

Please enter your comment!
Please enter your name here